تويتر
أول مشاركة لي معكم
السلام عليكم ورحمة الله وبركاتة,,
أنا أسمي محمد ,,وأعمل في أحدي الشركات السياحية في القاهرة ومتزوج وعندي طفلة جميلة عندها 3 سنوات...
دي أول مشاركة ليا في المنتدي وجذبني لة أن هناك تفاعل وردود في شكل سريع بين الأعضاء.
أنا كنت بربي كلاب وكنت بقوم بتدربهم كمان للغير ولكن تأكدت أن الموضوع حرام فقمت والله بالتخلص تماما منهم ووالله ببلاش لأن الفلوس تأكدت من حرمتها..
وبعدين ربيت كل حاجة أصل أنا بأحب الحيوانات جدا جدا وعندي بلكونة –أنا من ساكني شبرا مصر فمساحة البلكونة محترمة- وربيت جدي وماعز وبعدين جلهم جدري بعد الشراء ب 5 أيام حسبي الله في اللي باعهم, وبعدين ربيت فراخ جلهم افتراس وقتلوا بعض,, وبعدين ربيت وز صغير جلهم طاعون وماتوا جميعا الا تلاتة ,, وحاليا بفضل الله عندي تلات بطات مسكوفي وتلات وزات والتربية بهدف المنزل والأكثار من خلال الرقود علي البيض أن شاء الله....
المهم أنا نفسي أربي أرانب,, أنا عارف أنها متعبة بس أن شاء الله مع حبي لها والرعاية تكون كويسة بفضل الله..
أنا عايز أربي بهدف المنزل مش أكتر فكنت ناوي أجيب بطارية مستعملة رأسية لأنها الأرخص ,, سعرها 300 جنية 8 عيون فدة كويس ولا كتير ,,والراجل قلت لة أنا خايف من الأمراض قال دي مرشوشة مش عارف مادة أي واي ضد الفيروسات والميكروبات المهم اتوكل علي الله ولا أية؟؟
وكمان أنا هربي في غرفة جوة المنزل وهي هتكون بطارية واحدة مش أكتر أن شاء الله,, ففي مشكلة علي أبنتي و زوجتي أو حتي أنا من أنتقال أي أمراض حتي في حالة الألتزام بالتحصينات والنظافة؟؟
وعايز أجيب 3 نتاية ودكر (أسعارهم أية ,منين أجيبهم)؟؟
ومعلش أنا أسف العلف والأدوية منين أجبهم؟؟
وكمان قرأت عن مرض أسمة البروسلا ومرض اللستريا وبصراحة خايف منهم حيث البروسلا يسبب أجهاض الحامل واللستريا تصيب الأطفال بالألتهاب السحائي فما حقيقة دة ولو حصنتهم فيروسي وبكتيري برضة ممكن تصاب الأرانب بهذة الأمراض؟؟
ياريت لو حد يعرف الأماكن (السلالات, الأعلاف والأدوية) وتكون في القاهرة مش برة يرشدني...
أنا عارف أني طولت وزهقتكم بس والله نفسي أنجح ولو مرة علي سبيل التغيير فلازم أبدأ صح وأتمني دة يكون من خلالكم
وأي استشارة في السياحة أو تذاكر الطيران أنا تحت أمركم ورقمي هو 01002506064 ودة مش أعلان ولكن طريقة للرد الجميل
وياريت تتقبلوا موضوعي بصدر رحب وتفيدوني بما يحبة الله
وجزاكم الله خيرا والسلام عليكم ورحمة الله وبركاتة..
لا صغيرة مع الإصرار ولا كبيرة مع الإستغفار
تعليق